Home > செய்திகள் > பிரதமர் மோடிக்கு ஆதரவாக குஜராத் நீதிமன்றம் தீர்ப்பு

பிரதமர் மோடிக்கு ஆதரவாக குஜராத் நீதிமன்றம் தீர்ப்பு

2002 கலவரத்தில் பலியானவர்களின் உறவினர்களால் நகர்த்தப்பட்ட மூன்று சிவில் வழக்குகளில் இருந்து பிரதமர் நரேந்திர மோடியின் பெயரை நீக்குமாறு குஜராத் மாநிலத்தில் தாலுகா நீதிமன்றம் செப்டம்பர் 5 ஆம் தேதி உத்தரவிட்டுள்ளது.

குஜராத் மாநிலம் சபர்காந்தா மாவட்டத்தில் பிரந்திஜ் தாலுகா நீதிமன்றத்தின் முதன்மை மூத்த சிவில் நீதிபதி எஸ்.கே.காத்வி மூன்று வழக்குகளில் மோடியை ஒரு பிரதிவாதியாக சேர்க்கப்பட்டதை ரத்து செய்திருக்கிறார்.

மோடிக்கு எதிரான குற்றச்சாட்டுகள் பொதுவானவை மற்றும் தெளிவற்றவை, குற்றம் நடந்த இடத்தில் அப்போதைய குஜராத் முதலமைச்சர் மோடி இருந்தார் என்பதை நிறுவ எந்த தகவலும் கொண்டு வரப்படவில்லை என்று நீதிபதி காரணம் தெரிவித்துள்ளார்.

பிப்ரவரி 28, 2002 அன்று, பிரிட்டிஷ் நாட்டைச் சேர்ந்த இம்ரான் தாவூத், (அப்போது 18 வயது) இங்கிலாந்தைச் சேர்ந்த தனது மாமாக்களான சயீத் தாவூத், ஷகீல் தாவூத் மற்றும் முகமது அஸ்வத் ஆகியோருடன் தனது முதல் இந்தியப் பயணத்தை மேற்கொண்டார்.

இந்த நால்வரும் ஜெய்ப்பூர் மற்றும் ஆக்ராவுக்கு சுற்றுப்பயணம் மேற்கொண்டனர். அப்போது குஜராத் மாநிலம் சபர்காந்தா மாவட்டத்தில் உள்ள பிரந்தீஜ் அருகே உள்ள தங்கள் பூர்வீக சொந்த கிராமமான லஜ்பூருக்கு திரும்பிக்கொண்டிருந்தனர், அங்கு ஒரு கும்பல் அவர்களை வழி மறித்து, அவர்கள் வந்த டாடா சுமோவுக்கு தீ வைத்தது.

இந்த சம்பவத்தில் சயீத் மற்றும் அஸ்வத் ஆகியோர் தங்கள் குஜராத்தி டிரைவர் யூசுப் பிராகருடன் கொல்லப்பட்டனர். அதே நேரத்தில் ஷகீல் காணாமல் போனார். அவர் இறந்துவிட்டார் என்று கருதப்பட்டது.

இது தொடர்பாக 22 கோடி ரூபாய் இழப்பீடு கேட்டு கொல்லப்பட்டவர்களின் உறவினர்களான ஷ்ரின் தாவூத், ஷாமியானா தாவூத் (இருவரும் பிரிட்டிஷ் பிரஜைகள்), இம்ரான் சலிம் தாவூத் ஆகியோர் சிவில் வழக்குத் தொடர்ந்தனர். இந்த வழக்கில் அவர்கள் அப்போதைய குஜராத் முதல்வர் மோடியை முதல் பிரதிவாதியாக சேர்த்திருந்தனர்.

செப்டம்பர் 5 தேதியிட்ட உத்தரவில், தாலுகா நீதிமன்றம், “சம்பந்தப்பட்ட நேரத்தில் குற்றம் நடந்த இடத்தில் பிரதிவாதி எண் 1 (மோடி) இருப்பதைக் காட்டும் ஒரு குற்றச்சாட்டு கூட இல்லை. கூறப்படும் செயலில் அவர் நேரடியாகவோ அல்லது மறைமுகமாகவோ ஈடுபடுகிறார் என்பதற்கான ஆதாரமும் இல்லை.

அப்போதைய மாநில அரசாங்கத்தின் செயல்களுக்கு மோடி எவ்வாறு தனிப்பட்ட முறையில் பொறுப்பேற்கிறார் என்பது குறித்து பாதிக்கப்பட்டவர்களின் உறவினர்கள் எந்த வகையிலும் கூறவில்லை.

கோத்ராவுக்கு முந்தைய மற்றும் பிந்தைய அனைத்து சம்பவங்களுடனும் பிரதிவாதி நம்பர் 1 (மோடி)யை இணைக்கவும், அதன் மூலம் பிரதிவாதி நம்பர் 1 (மோடி) யை குற்றவாளியாக வரிசைப்படுத்தவும், அவரை இழப்பீட்டுக்கு பொறுப்பேற்கவும் இந்த வாதத்தில் சில புத்திசாலித்தனங்கள் செய்யப்படுகின்றன. எனது பார்வையில், இத்தகைய பொறுப்பற்ற குற்றச்சாட்டுகள் மோடிக்கு எதிராக எந்தவொரு தொடர்பையும் ஏற்படுத்தவோ அல்லது நடவடிக்கைக்கான காரணத்தை எழுப்ப உதவவோ முடியாது” என்று நீதிபதி கூறியுள்ளார்.

You may also like
“தமிழகத்தில் தாமரை மலர்ந்தே தீரும்” : நடிகை குஷ்பு
பாஜகவில் இணைந்தார் நடிகை குஷ்பு
நீல்கிரிஸ் சூப்பர் மார்க்கெட்டை சூறையாடிய பாஜக பிரமுகர்கள் உள்பட 19 பேர் கைது
சசிகலா வந்தால் அதிமுகவில் மாற்றம் ஏற்படும்

Leave a Reply